Khawpuiah retheihna ûmbo turin Nasa takin hma kan la - Tawnluia
Zonuam Primary School-a Multipurpose Recreational Center & Community Hall sak turah nimin khan deputy chief minister Tawnluia'n lungphùm a phúm a; thu sawiin, khawpui chhungah retheihna ûmbo turin nasa takin hma an lak thu a sawi.
Dy. Chief Minister chuan, kum 2006-ah chief minister Zoramthanga hoin khawpui hmasawnna bik enkawl turin UDPA department din a nih thu sawiin, "Kum 14 chauha upa, din tirh aṭanga thawktu tlemtê chauh nei chungin hmalakna ngah ber department zingah a tel pha. Mizoramah khawpui 23-te tihhmasawn hna hi UDPA chuan a enkawl a ni," a ti.
Khawpui chhunga lirthei dahna hmun tam zawk buatsaih nan PAHOSS kalpui mek a nih thu sawiin Tawnluia chuan, "Heta tan hian vbc. 60 chuang dah a ni a, mimal hmunhma nei ṭhate parking siamna turin a thlàwnin ṭanpuina sum pek a ni. Khawpuia retheihna ûmbo turin nasa taka hmalak a ni bawk," a ti a, UDPA hnuaiah central scheme hrang hrang a awm thu a sawi.
Deputy CM chuan, Covid-19 avangin khawvel pumah hmasawnna hnain a tuar tih sawiin, "Hripui avangin mihring nunna leh dam khawchhuahna tur chu dah pawimawh hmasak loh theih a ni lo a, Mizoram sorkarin duh anga hmasawnna hna dangte a thawk chak thei lo hi a pawi hle. Mipui pawhin an hriatthiam ka beisei," a ti.
Lungphùm phùm inkhawm hi UDPA secretary Dr C Vanlalramsanga'n a kaihruai a, minister of state TJ Lalnuntluanga leh bialtu MLA Zothantluanga te pawh an tel.
Multipurpose Recreational Centre & Community Hall hi state plan fund (2018-19) aṭangin cheng nuai 500 sénga sak tur a ni a, chhâwng lia sak tura duan a ni.