Nakkuma Synod Moderator atan Rev. Dr Vanlalnghaka thlan a ni

Mizoram Presbyterian Kohhrana inkhawmpui lian ber, Synod Inkhawmpui vawi 97-na neih mekah nimin khan rorel ṭan a ni a; kum 2021-a Synod moderator atan Rev. Dr Vanlalnghaka Ralte, ATC thlan a ni.

Nimina rorel ṭan hmain moderator kal chhuak Rev. R Lalchangliana'n moderator thar Rev. Dr C Lalhlira hnenah moderator kawrfual pein mawhphurhna a hlân a, rorel ṭan a ni. Committee aṭanga thu lutte an ngaihtuah bakah, general agenda pali an ngaihtuah hman a; vawiinah rorel chhunzawm a ni ang.

Kum 2021 Synod In­khawmpuia puipa turte an ruat a; secretary (senior) atan Upa Lalrinmuana, secretary (junior) atan Rev. ZD Lalhmachhuana (Ramhlun), Finance officer atan Rev. B Sangthanga (executive secretary) leh Rev. Lalramliana Pachuau, statistician atan Upa Lalthianghlima, Bethlehem Venglai, executive secretary atan Rev. Lianhmingthanga Sailo leh Rev. K Lalrin­mawia te an ruat a ni.

Kum 2023-a Synod Inkhawmpui chu Mission Vengthlang bial thlen turin Mission Vengthlang kohhran biak-inah nghah turin an rél bawk.