2015-16 ah kawlphetha lei nan Cheng vbc. 210 vel hman a ni
Power & Electricity department chuan kum liam ta, 2015-16 chhung khan Mizoram tana kawlphetha lei nan cheng vbc. 210 vel an hmang a; kawlphetha leina aṭanga an sum hmuh aṭangin sorkarah cheng vbc. 166.62 an chhûng lut thung.
P&E hotute chuan, êng ṭha tak a awm theih nan phai aṭanga kawlphetha an lei dan chu mipuiin an mamawh dan azirin darkar 24 chhung an vil reng a, chu chuan sorkar sum hman ral tur nasa takin a chhâwk zângkhai tih an sawi.
P&E department hotute sawi danin, kum 2015-16 chhungin kawlphetha lei nan cheng vbc. 210 vel hman a nih lai hian, Mizorama hydel project tênau pasarih
aṭangin cheng vbc. 11.5 vel man an thawk chhuak ve thung.
State pawn aṭanga kawlphetha lak luhte leh state chhunga siam chhuahte chu mipui hnenah unit khat Rs. 3.98-in an hralh ṭhin.
Kum khata kawlphetha lei nan cheng vbc. 210 vel hmang mah se, mipui aṭanga electric bill an dawn te, sorkar department hrang hrangin an hmanna man leh state páwna an hralh leh chhâwnna aṭangin sorkarah cheng vbc. 166.62 an chhung lut a; chu'ng zingah chuan state páwna transmission company-a investment aṭanga hlâwkna an dawn chu cheng vbc. 12.34 a tling.
Mipui aṭanga electric bill an dawn hi kum 2015-16 chhung khan cheng vbc. 132.87 a ni. JERC-in dân a siam angin, street light chhit man chu LAD-in an pe a, kum khatah vbc. 2.39 an chawi a; AMC-in an huam chhunga street light chhit man an chawi thung. Mizoram chhim lama autonomous district council-te pawhin an huam chhunga street light chhit man an chawi a ngai a, mahse an pe ṭha lo niin an sawi.
State danga power transmis-sion investment awmzia sawi-fiah-in P&E hotute chuan, "State ṭhenkhatah company an din dawnah investment kan zu ti a ni ber. Company-te'n transmission line an siam dawnah sum lo let leh tur hisápin 10%-te kan thawh ve a, cheng vbc. 41 vel kan sennaah sum kan têl hmasak ber kumin vbc. 12.34 kan hmu," an ti.
Electric hmanruate hi kum 35 vel ṭha taka dam tura ngaih an nih avangin, an senso chu kum tlem têah an hmu let ngei dawna a lan thu an sawi.
P&E department hotute sawi danin, tlawmngai pawl, kohhran leh sorkar department-in hun pawimawh bik an hman leh inkhawmpui liana an hman atan 'temporary connection' an pe
ṭhin a, mahse, inên chhâwk ngai khawpin mipui chanái an pawt hêk ngai lo tih an sawi. Temporary connection atan hian dân angin sum chawi a ngai a, temporaty connection-ah hian kum kal ta khan cheng nuai 26.36 an hmu.
Electric connection nei loin an pawh rûk vanga an chawi te, connection nei siin dan loa an hman vang te, connection load aia tam hman vang te, line extend vang te, meter kaltlang loa kawlphetha pawh vang leh thi dang vanga sum an chawitir
aṭangin Rs. 1,05,000 an hmu. State páwna an hralhna aṭangin cheng vbc. 19 an hmu bawk.
Kawlphethaa intodelh lo chunga an hmuh ṭhenkhatte state páwna an hralh ṭhin chhan sawifiahin, P&E hotute chuan, "North Eastern Regional Load Despatch Centre (NERLDC), Shillong-ah kan mamawh dan kan thlen a. Ni tin kan mamawh dan a danglam reng a. Zan dar 11 vel aṭang zing dar 4.30 vel thlengin mamawh tam loh laiin kan lei sa hman sen loh a awm theih ṭhin avangin, hralh loh chuan sum tam tak kan chawi thlawn dawn a ni," an ti.
An sawi danin, sorkar depart--ment hrang hrangte'n kawl-phetha hman man kum khat chhungin cheng vbc. 10 vel an ba ṭhin a; a hunah an pek theih loh ṭhin avangin an pawisa batah hremna (penalty) nen an pek tel a ngai ṭhin.
2015-16-a Mizorama hydel power dinhmun
Hydel Project District Capacity Sum hmuh
Khawiva SHP Lunglei 1.05 MW Rs. 18,18,399
Tuipui SHP Champhai 0.50 MW Rs. 5,78,700
Kau Tlabung SHP Serchhip 3.00 MW Rs. 59,83,440
Maicham-I SHP Serchhip 2.00 MW Rs. 33,10,566
Maicham-II SHP Serchhip 3.00 MW Rs. 23,02,704
Lamsial SHP Champhai 0.50 MW Rs. 1,72,800
Serlui-B HEP Kolasib N.A Rs. 1,47,05,100
Total Rs. 2,88,71,709