Bomb hmanga Tut luia sangha mantute Congress party-in hrem ngei an phût
Mizoram Pradesh Congress Committee (MPCC) chuan nimin khan thuchhuah siamin, Phaizau khawtlangin Tut lui an humhalh laia November 21, 2020-a bomb hmanga sangha mantu Mamit bialtu MLA H Lalzirliana leh Mamita MNF hruaitute chu dàn hmanga hrem an phût thu an tarlang.
MPCC chuan, "Tunlai khawvel changkanna (social media) hmanga Mizoram mipuite’n kan hmuh leh kan hriat, Phaizau khaw sangha humhalh lai bomb-tute zinga tel Mamit bialtu MLA H Lalzirliana leh Mamit MNF hruaitute hi dàn hmanga hrem kan phût tlat a ni," an ti.
Bomb hmanga sangha mantute chuan kg. 40 chuang an man tih sawiin MPCC chuan, an tih dik lohzia hriain Phaizau VLTF hnenah Rs. 10,000 chawiin, ziakin thupha an chawi tawh tih an sawi a, "Hei hi khawtlang inngaihdamna sáng ber ni mah se, Mamit bialtu MLA H Lalzirliana leh MNF hruaitute hi dan bawhchhetu an nih avangin dan an bawhchhiat man an tél ngei turah kan ngai," an ti.
FIR thehlut an awm lo a nih pawhin, Mizoramah dan ngaih pawimawh zel a nih theih nan, dan dik taka an chunga action la turin Mizoram sorkar an phût a ni.
Congress party chuan, MLA H Lalzirliana leh Mamit leh Phaizaua MNF mi leh sate'n Lalringliana, range officer, Mamit Forest Range enpuina (observation) te, Sanghnuna, Mamit Forest Range a thawk lai leh R Lalchhunga, Phaizau te hriatpuinaa Zodingluaia s/o Vanlalringa, Phaizau-in statement a pek aṭanga bomb hmanga sangha kg. 40-50 vel mantute hming an tarlang.
Sangha mantu an tarlante
1. H Lalzirliana, MLA, Mamit
2. H Lalthlengliana, Mamit
3. Lalvulluaia, Mamit
4. Lalchhandama, Mamit
5. Zodingluaia, Phaizau
6. Hreuthangpuia, Phaizau
7. Chuauthantluanga, Phaizau
8. Lalrikhuma, Phaizau
9. Malsawmdawngliana, Mamit
10. Sachina (lawngpu), Phaizau
11. Lalchawimawia, Phaizau