Kut hnathawktute sumin kan ṭanpui dawn - Zoramthanga

MNF president Zoramthanga chuan, Mizoram intodelh theih dan tur chu MNF ngaih pawimawh ber a nih thu leh, kut hnathawktute hlawhtlin ngei theihna turin suma ṭanpuina (financial support) pek an tum thu a sawi.

Zoramthanga hian April 30, 2016 zing khan Phainuam community hall-a vantlang inkhawmah thu sawiin, MNF sorkar leh hunah kut hnathawktute
ṭanpuina an pek dawn thu a sawi a, "Chawa Mizoram intodelh theih nan leileta siam theih ram zau tak laih zau hna kan thawk leh dawn a, kut hnathawktute tan Rs. 3,00,000 aia tlem lo sorkarin ṭanpuina sum leh pai a pe dawn. Sumte hi NLUP sum anga kal pah sem vel mai mai tur a ni ve lo," a ti.

Mizoram hmasawnna turin item
ṭhen-khatah insâwrbing an tum thu sawiin, Zoramthanga chuan, NLUP chu 'Bang chhak sât thlaa bang thlang pinna atana hman ang an nih thu a sawi nawn a; NLUP chu an pu berin a tuipui tawh lo nia sawiin, "Pu berin ama policy ngei pawh 'Ka tuipui tawh lo,' a ti te, an term kal lai meka kum riatnaah ‘New Economics Development Policy' an duang tharte hi inbumna a ni," a ti a; Central aṭangin NLUP sum tur an hmu thei tawh dawn lo tih an hriat chian avangin NEDP an siam niin a sawi.

MNF President chuan, May 19-a khaw 31-a V/C inthlan lo awm turah MNF candidate-te thlang tling vek turin mipuite a chah a; Congress sorkar chu inthlan buatsaih duh lawk loah puhin, "Sipai thuneihna hnuaia kûntir che u an tum a, keini’n a rapthlak lutuk tiin theih tawpin kan nawr a. Rambuaiah an puang lo chauh che u a ni. Chuvangin, Mizoram hmar lam bial mipuite tan Congress hi thlan chi a ni lo," a ti.