KHAWTHLIR

Congress chak

April 29, 2016-a CADC hnuaia village council 10-a bye-election neiha vote tlate chu Inrinni khan chhiar a ni a, seat 42 awmah Congress-in seat 36, BJP-in seat 5 leh MNF-in seat 1 an la. Khaw 10-ah hian Congress-in sorkarna an siam thei vek a ni.

Thisen pe

Inrinni khan SAY Central North Division chuan Aizawl Civil Hospital tan thisen unit 153 an pe a, a petute mipa 128 leh hmeichhia 25 an ni. Dawrpui Vengthar branch KṬP pawhin Central KṬP Blood Donation Calendar angin Synod Hospital tan thisen unit 27 an pe a, a petute mipa 26 leh hmeichhia pakhat an ni.

Meth man

Lungleia Excise & Narcotics department leh BSF-te chuan, Inrinni chhun dar 12 khan Lunglei Bazar Vengah Methamphetamine mûm 15,000 (kg. 2) an man. A neitua puh mi pathum - Lalmuanpuia (38) s/o Vanlalauva, Tuidam, tuna College Veng, Aizawla khawsa mek, Lalchhunpuia (28) s/o Zotawnliana, Tlabung Chawnpui leh Vanlalrengpuia (28) s/o Ngurhmingliana (L), Charlui, tuna Dinthar Veng, Aizawla khawsa mek nia insawite an man tel.

Lehkhabu tlangzarh

HT Sangliana, IPS (rtd.)-in a chanchin a ziahna, 'HT Sangliana: An Autobiography of Super Cop' tih chu April 30, 2016 khan Aizawl Press Club-ah MJA president Vanlalrema Vantawl-in a tlangzarh. Lehkhabu hi phek 458-a chhah, Rs. 250 man a ni.

MJS sîksawi

Law & Judicial secretary R Thanga chu Lunglei District and Sessions Judge atan sawn a ni. Lungleia District & Sessions judge Marli Vankung chu Motor Accident Claims Tribunal-a presiding officer atan ruat a ni a; MACT presiding officer ni lai KL Liana chuan MACT enkawl tel tawh loin, ND&PS Judge hna chiah a thawk tawh ang.

BKHP Day

Vawiin hi Baptist Kohhran Hmeiche Pawl din champha, BKHP Day a ni a, Mizoram pumah BKHP-te'n an hmang dawn. Kumina BKHP Day thupui chu 'Thlen chin aṭanga hmasâwn' tih a ni a,.