Rotling nei turin mipui an dawhtheih a ngai - R Lalzirliana

Home minister R Lalzirliana chuan, Mizoram tana rotling leh thil ṭha nei turin mipuite an dawhtheih a ngaih bakah, an nghah peih a ngaih thu a sawi.

Saitual leh Saichal inkara Tuivawl lei, April 29, 2016-a a hawnaah thu sawiin R Lalzirliana chuan, "Mipui nawrna vanga hmanhmawh phílì ai chuan dik takin, muangcháng si loin, khua rei daih tur, ṭha leh tlo siam zawk tur leh Zoram tana rotling nei turin mipui lam pawh kan dawhtheih a, kan nghah peih a ngai," a ti.

Home Minister chuan, kawng ṭha neih chu hmasawnna kengtu a nih avangin a pawimawh rualin, ramngaw suatna, nungchate ûm darhna, khua tilum zualtu leh tui harsatna siam thei a ni tih a sawi a, "Mmipuiin ramngaw a theih lai apiang humhalh a, thingphun kan uar a ṭul," tiin, YMA-te'n Tuivawl lei dawhna leh a chhehvel chu humhalh se a duh thu a sawi.

Khualzahawm minister H Rohluna pawhin thu sawiin, Ṭawi leh Lengteng constituency inkalpawhna, Manipur thlenga hawlh tlang kawngpuia lei dawh hawn a ni chu lawmawm a tih thu a sawi a, "Hei hian nasa takin kawng a pawt tawi a. Development lo kal hi kan hman ṭangkai thiam chuan state changkang kan ni ang," a ti.

Lei hawnnaah hian parliamentary secretary Lt.Col. ZS Zuala leh Hmingdailova Khiangte, MLA Vanlalawmpuii Chawngthu bakah, PWD engineer-in-chief R Vanlaltluanga leh chief engineer K Lalsawmvela te pawh an tel.

Tuivawl lei dawhna atan hian cheng nuai 356.68 ruahman a ni a, cheng nuai 328 hmangin dawh zawh a ni. Lei hi metre 65-a thui leh metre 4.25-a zau a ni.