Mi thattua puh chet dan Zarkawtin an ngaimawh

August 10, 2013-a Zohmangaihi, Zarkawt that a, a ruang Sakawrhmuituai khâma paihtua puh, a pasal Lalremruata Ralte chu bail-a chhuah a nih hnuah, April 29, 2016 khan Court-in bail-a a chhuah dan bawhchhiain, Zarkawta a nupui chhungte inah a kal a; Zarkawt khawtlang chuan Lalremruata Ralte hi Zarkawt veng rap tawh lo turin an hriattir nghal.

Thu dawn danin, Lalremruata Ralte hi Aizawl district-a additional district & sessions judge Vanlalmawia Court chuan April 25, 2016 khan thla thum chhung bail-a chhuah lailâwk a phalsak. Bail-a a chhuah chhung hian a nupuite chhung chu tibuai lo tur te, Court phalna loin Mizoram chhuahsan lo tur te, a thubuaiah harsatna thlen zawnga che lo tur te, Court-ah a hun taka inlan tur te, Aizawl Police Station-ah a inlan ṭhin tur te, buaina lam hawi thil danga inhnamhnawih lo turtea tih a ni.

Lalremruata Ralte hian April 29 khan Zarkawtah K Zohmangaihi nu leh a chhungte chennaah a kal tih sawiin, Zarkawt Joint Action Committee chuan, "K Zohmangaihi chhungte an tithlabár hle a, khawtlang hruaitu hrang hrang pawh kan tlan khawm nghal a. Lalremruata hi bail-in a chhuak tih Zarkawt mipuiin kan hriat ringawt pawha nu nau kan thlabâr sa tehlul nen, hetianga Zarkawt chhunga ngampa taka an rawn kal mai hi kan duh lo tak zet a ni," an ti.

Local council, YMA, MHIP leh MUP-te telna Zarkawt JAC chuan, Lalremruata leh a chhungte chu Zarkawt veng chhungah inlan tawh lo turin an hriattir nghal a ni.