Mizo Zirlai Pawl-in Vety College-a hna lak vil an tum

MZP hruaitute chuan Inrinni khan Aizawl Press Club-ah thuthar thehdarhtute an kâwm a; College of Veterinary Sciences & Animal Husbandary (CVSAH), Selesiha hna lak an vil zui zel tawh dawn thu sawiin, tling leh tlak an awm chuan ram leilung fate ngei la turin thuneitute an ngen.

MZP president Lalsangzuala Ngente chuan, CVSAH-a hna lak dan dik tâwk lo a awma an hriat avangin zir chiang turin a hmun ngeiah an kal tih sawiin, "CVSAH-a thawk tur medical attendant post hnawh khahna tura kum 2012-a advertisment chhuah tawh tun thlenga lak a la nih loh laia CAU, Manipur-a thawk tura kum 2011-a advertisment chhuah tawha diltute pahnih Mizorama thawk tura tih an ni hi kan duh lo a ni," a ti a; mi pahnihte chu joining report pe lo tura an ngen thu a sawi.

MZP President sawi danin, April 27, 2016 khan joining report pe lo tura an ngen pakhat zawkin joining report a pe tih an hriat avangin MZP hruaitute'n April 29 khan Dean an hmu a; a office aṭangin CAU Vice Chancellor pawh telephone hmangin an bia a, a lo chhàn danah an lungawi loh avangin Dean dawhkân an suasam a ni.

CAU, Imphal-in a hnuaia thawktu tur lakna dan recruitment rules leh service rules mumal tak tun thlenga a la nei lo nia sawiin, MZP hruaitute chuan, "Recruitment rules leh service rules felfai tak nei thuai turin thuneitute kan ngen. Hna lak a nih dawn reng rengin Mizorama chanchinbu lian leh rintlak deuhahte advertisement chhuah ṭhin tawh kan duh," an ti.