COVID-19: Mizoram dinhmun Hripui vei mi 9 hmuh belh a ni

December 8, Thawhlehni khan Mizoramah swab sample 906 endik a ni a, ZMC-ah mi 384, TrueNAT-PCR hmangin district pakuaah mi 164 leh RAT hmangin district pakuaah mi 358 endik a ni. Mi 906 zingah Covid-19 positive mi pakua an awm.

Thawhlehnia hripui vei hmuh pakua hi swab sample endik 906 aṭangin 0.99% a ni. Mizoram aṭanga swab sample 1,59,750 endik tawh ṭangin Covid-19 vei mi 3,977 hmuh chhuah a ni tawh a, hei hi 2.49% a ni.

December 8-a Covid-19 positive hmuh thar mi pakuate chu Mizoram chhunga kái mi pali leh state páwn aṭanga tun hnaia rawn lut mi panga an ni a; tualchhunga kai palite chu hri an kài ṭanna hriat loh vek a ni. Mi pakuate zingah natna (Covid-19 symptom) nei an awm lo.

Sorkar thuchhuah tarlan danin, TrueNAT-PCR hmanga Covid-19 vei hmuh chhuah pangate chu mipa pali leh hmeichhia pakhat an ni a; puitling vek niin, tun hnaia state páwn aṭanga rawn lut vek an ni.

RAT hmanga hripui vei hmuh chhuah palite chu mipa puitling vek an ni a; Mizoram chhunga kái vek leh hri an kàina hriat rih loh vek a ni.

TrueNAT-PCR hmanga hmuh:

BSF, Melte - 3: Mipa kum 31, 43 & 49. Bihar, Kerala leh Tamil Nadu aṭanga rawn lut, 131 Bn BSF camp, Méltê-a khung hran lai, symptom nei lo vek.

BSF, Serchhip - 1: Mipa kum 48, Assam aṭanga rawn lut, 60 Bn BSF camp, Serchhip Dawngzawla inkhung hrang mek, symptom nei lo.

Tuipui - 1: Hmeichhia kum 26, Khawzawl Hospital-a hmuh chhuah; Goa aṭanga haw, quarantine facility-a awm lai, symptom nei lo.

RAT hmanga hmuh chhuah:

Lunglei - 2: Mipa kum 31 & 49, Aizawl mi ve ve. Kum 31 mi Tuikual North-a chêng, Krismas hmang tura Lunglei Bazar Venga zin, hri kàina hriat loh, symptom nei lo. Kum 49 mi Vaivakawna chêng, Post Office hna buaipui tura Lungleia zin, hri kàina hriat loh, symptom nei lo.

Lawngtlai AOC Veng - 2: Mipa kum 30 mi ve ve, hri an kàina hriat, symptom nei lo ve ve.