International Science Fair-ah Mizo naupang pahnih an tel

International science fair neih mek, Expo Mexico 2020-ah India ram aiawhin Mizo zirlai pahnih - R Lalnuntluangi leh Lalhruaitluanga, St. Paul's HSS-a pawl 12 zirlai ve ve an tel.

Expo Mexico 2020-ah hian Mizo naupangte hian December 8, Thawhlehni tlai dar 5 khan an project siamte online hmangin an sawifiah a, zawhnate an chháng nghal. An pahnih hian Science Teachers Association Mizoram (STAM)-in a tirhte an ni.

R Lalnuntluangi project chu areca husk (kuhva káwr) aṭanga paper siam chhuah dan a ni a; kuhva káwra cellulose leh a káwr hnip lai lak khawm aṭanga paper siam dan a entir bakah, India kuhva leh Myanmar kuhva káwrte la khawmin a khaikhin bawk.

Lalhruaitluanga chuan thingpuifêa antioxidant awm dan project-ah a hmang a; green tea chu antioxidant awm tamna a nih dan te, Mizo thingpuifê Zîksen leh Darzo te chu a ṭhat dan leh tihlâr zel tlak a nih dante a tarlang a ni.

STAM chuan Samagra Shiksha nen ṭang dunin Mizoramah Children Science Congress an buatsaih a, district level-a intihsiaka tiṭhate tan state level intihsiakna an buatsaih leh a; chuta tiṭhate chu National Children Science Congress-ah Mizoram aiawha tirh an ni.

National level-a inelnaah an project siam leh sawifiahna aṭangin Mizo zirlai pahnihte hi India aiawh tura thlan an ni a; Foundation for Global Science Initiative scientist-te'n interview an neihpui leh hnuah Expo Mexico 2020-ah India aiawh tura tih an ni.

Education minister Lalchhandama Ralte chuan Mizo zirlai pahnihte an kal zelna turah Mizoram tan mai ni lo India ram tan chhuanawm taka ke pen zel turin duhsakna a hlan.