BPL dik tak ni lo BPL nih a rem tawh lo BPL-a awm luih a zahthlak dawn: Planning dept.

Planning department chuan thuchhuah siamin, ṭanpuina beisei avangin below poverty line (BPL)-a inkhung mai mai a rem tawh dawn lo an ti a; "BPL ni si lo, BPL-a awm tum hi thil zahthlak a nih dawn," an ti.

Planning department thu-chhuah tarlan danin, BPL baseline survey neih mekah tehfung fel tak siam a nih avangin BPL ni lo list-ah hian dah theih a ni dawn lo.

Tehfung hmanga BPL list siam tur a nih avangin rethei tak tak, mahnia intungnung zo lo bak chu BPL huangah khung luh theih a ni dawn lo a, ṭanpuina beisei vanga BPL ni lo, BPL list-a khung a rem tawh dawn lo.

BPL Baseline Survey hi Mizo-ram dinhmun dik tak hriat theihna tur leh, chumi aṭanga Mizorama retheite chawikanna atan hnathawh dan tur dik leh fel taka ruahman a nih theihna atan a pawimawh a ni.

BPL dik tak ni lo, list-a lo awm palh an awm pawhin, list en fel a nih hnuah thil zahthlak tawp a ni dawn tih sawiin Planning department chuan, "Mi tin fimkhur hle turin kan inhriattir nghal a. Pathian leh sorkar zarah BPL kan ni lo thei hlauh hi lawmna tur a ni. BPL ni si loa BPL list-a awm hi Mizo tan thil zahthlak a ni tih pawm ila, kan nihna dinhmun dik tak ṭheuh hi he baseline survey-ah hian i ziah luhtir ang u," an ti.

Planning chuan, BPL Baseline Survey kalpui mekah mipuite puihna an dil a, "He hna hi September 2016-a thawh zawh vek tura ruahman a ni. Hna chak leh dik taka thawh a nih theih nan state level, district level leh khua/veng level-a monitoring committee hrang hrang din a ni," an ti a; committee-ah chuan tlawmngai pawl hrang hrang sawm bik tel tura beisei an nih thu an tarlang.

Planning department chuan, Mizoram sorkarin official data leh statistics rintlak dik ruahman turin chak taka hma an lak mek thu sawiin, "Official data dik leh rintlak neih hi policy mumal tak siam a nih theih nan leh kan ram dinhmun dik tak kan hriat theih nan leh hmasawnna kawng zawh nan a pawimawh. He hna atan hian Mizoram mipui zawng zawng lungrual taka kan thawhho a pawimawh," an ti.

Hetih lai hian hian, Planning department-in BPL Survey Baseline-a atana thawhhopuia an sawmna chu Central YMA chuan a lo hnar tawh a ni.