Bawlhhlawh sawngbawl dan thar

Mizoram Pollution Control Board (MPCB) chuan thuchhuah siamin, sorkar laipuiin damdawi-in bawlhhlawh sâwngbawl dan thar, Bio-Medical Wastes Management Rules, 2016 a tichhuak thar tih an tarlang a; "He dan thar hian BMW (Management & Handling) Rules, 1998 a luahlân tawh ang," an ti.

MPCB tarlan danin, dan thar hian mihring enkawlna damdawi-in leh ran damdawi-inte bakah, vaccination camp, blood donation camp, surgical camp, free clinic leh damdawi-in páwna damlo enna thil tih reng reng a huam dawn.

Damdawi-in bawlhhlawh hlawm 10-a ṭhen ṭhin chu thliar hran a awlsam zawk nan chi li-ah ṭhen a ni tawh dawn a; phalna (authorisation) awlsam zawka neih dan te siam a ni.

Bawlhhlawh hâl ralna, incinerator-in boruak a tihbawlhhlawh tur vên nan boruaka a bawlhhlawh paih chhuah theih zat nasa zawka khuahkhirh a ni bawk.

State sorkarin damdawi-in zawng zawng inhman ṭâwm theih, bawlhhlawh sawngbawlna hmun, ‘Common Bio-medical Waste Treatment and Disposal Facility' (CBMWTF) a siam tur a ni a; CBMWTF a awm a nih chuan, a awmna aṭanga km. 75 bial chhunga damdawi-in leh health care thil reng rengin anmahni ta bil bawlhhlawh sawngbawl leh paihna hmun siam loin, sorkar siam CBMWTF an hmang ve tur a ni.