Champhai vela vawk hri lêng PRRS a ni tih finfiah a ni tawh

Tun hnaia Champhai leh a chhehvel khuaa vawk natna hri leng chu, Porcine Reproductive & Respiratory Syndrome (PRRS) a ni tih finfiah a ni tawh. Lawngtlai leh a chhehvel khuaa vawk natna hri lêng pawh endik a ni dawn.

Vanglaini palai zawh-na chhangin AH&Vety minister C Ngunlianchunga chuan, "Champhai leh a chhehvela hri lêng vanga vawk damlo leh thite chu endik vek an ni tawh a, PRRS a ni tih finfiah a ni tawh. PRRS hi a darh zel lohna atan sorkar chuan theihtawp a chhuah dawn a, natna vei mekte pawh a theih ang anga enkawl tum a ni," a ti.

AH&Vety Minister sawi danin, AH&Vety Joint Director hoin vawiin hian mithiamte'n Champhai an pan dawn a, vawk natna hri leng mek hi an zir chiang ang. Hei bakah hian, Champhai DVO leh a thawhpuite chuan PRRS léng mek chungchangah Champhai leh a chhehvel khuaah awareness campaign an nei dawn a ni.

Lawngtlai leh a chheh-vel khuaah pawh vawk hri a lêng mek tih sawiin C Ngunlianchunga chuan, "Vawk natna hi eng nge tih finfiah turin laboratory-ah endik a ni dawn a, eng natna nge tih kan hre thei thuai ang," a ti a; vawiin hian Vety mithiamte'n Lawngtlai an pan ang a, vawk hri léng mek chu an zir chian dawn thu a sawi.

AH&Vety Minister chuan, PRRS a darh zel lohna atan vawk neitute fimkhur se a duh thu sawiin, "PRRS hi inkai chhawn a awl avangin PRRS vei vawk thite chu phûm emaw, hâl ral hram hram tur a ni. Mihring tan PRRS hi hlauhawm lo mah se, tumahin ei loh a ṭha. A sa channa vel
aṭang ringawt pawhin hri hi a kai darh thei a ni," a ti.

Champhai leh a chhehvel leh Lawngtlai leh a chhehvel khuaah hian vawk eng emaw zat an thi tawh a ni.

Champhaiah chuan vawk thi a tam avangin tun hnai khan YMA Sub-Headquarters OB-te leh a hnuaia Health & Sanitation Sub-Committee-te chu tun hnai khan an ṭhukhawm a; vawk hri lêng mek chu mipuite'n hriselna kawngah an tuar thei nia an hriat avangin vawk thite phûm vek turin mipuite zirtina leh hriattirna neih leh vawk phûmna tur hmun siam an rel a ni.