KHAWTHLIR

V/C by-election

Mizoram State Election Commission chuan MADC huam chhunga village council ṭhiah taka bye-election neih hun atan May 26, 2016 a ruat. Bye-election neihna turte chu Saikao, Theiri leh Lolai te a ni a, general seat 10 leh reserve seat pathum a awm.

Book Fair

Maggie L Ralte-in Vanapa Hall-a Book Fair a buatsaih chu nimin khan minister R Lalzirliana'n a hawng. R Lalzirliana chuan, "Thluaka thil khâwl khawm tawh chu misual leh rûkru lakah pawh a him a, bo ve mai thei a ni lo a, lehkhabu chhiar tam hi rohlu ber a ni," a ti. Book Fair hian May 16, thleng a awh ang.

CM Relief Fund

Mizoram Iskut Growers Association (MIGA) chuan, nimin khan chief minister relief fund-ah Rs. 10,000 a chhung lut a; MPCC general secretary H Lalzamlova, pawhin CM relief fund-ah Rs. 15,000 a pe bawk.

IPS transfer

Ministry of Home Affairs chuan Mizo IPS officer Arunachal Pradesh-a awm mek LH Shanliana chu Mizorama awm turin a sawn. AP sorkarin an release hunah LH Shanliana hian Mizoram a pan ang.

Nungcha humhalh

Chalfilh Group YMA chuan thuchhuah siamin, an huam chhunga nungcha, thing leh maute an humhalh tlat thu tarlangin, "Tur leh generator etc hmanga luia nungchate suasam khap a ni a, a ti lui man chhuah an nih chuan an chungah engtiang pawhin group-in hma la se an sawi buai thei lo ang," an ti.

Larsap zin

Governor Lt. Gen. Nirbhay Sharma chu nimin khan New Delhi-ah a zin a; ruahman lawk dan chuan May 12 ah Aizawlah a rawn let leh dawn a ni.

Lusun khawhar

Dr. Judy Laldinpuii (42) d/o C Tawnluaia, Tuikual South, Guwahati-a hna-thawka awm chu nimin chawhnu khan Guwahati-ah a thi. Dr. Judy hi neuro-surgery super specialist a ni a, Guwahati-a vui a tur niin thudawnna chuan a sawi.