Oil leh gas zawn hna thawh mek thlirho

Nimin khan Secretariat conference hall-ah Mizorama oil leh gas zawn hna kal mek thlirhona, 7th Review Meeting of Oil & Gas in Mizoram buatsaih a ni a; Geology & Mineral Resources minister H Rohluna'n a hmanpui.

H Rohluna chuan, oil leh gas zawn chu hna hau tak, hun leh tha tam tak bakah, thiamna sang tak hmanga thawh ngai a nih avangin sorkarin uluk taka hma a lak thu a sawi a, "Mizoram sorkar chuan ONGC leh Oil India Limited (OIL)-te chu theihtawpin a thawhpui zel dawn a ni. Sorkarin Hydrocarbon Vision 2030 thil tum tihlawhtling turin hma a la dawn," a ti.

GMR Minister chuan, NE Hydrocarbon Vision 2030 zûlzuia Bairabi Thermal Plant, megawatt 12 atan Meidum leh Cachar area-a gas hmuhchhuah tawhte hman ṭangkai dan tur zir chiang turin ONGC thuneitute leh department official-te a chah.

Parliamentary secretary (GMR) Joseph Lalhimpuia pawhin thu sawiin, meeting-a thurelte chu a bawhzui kawnga ṭhahnemngai leh zual turin offcial-te a sâwm a ni.

Meeting hi GMR secretary Zothankhuma'n a kaihruai a, GMR director Lalhmachhuana leh company hotute'n a lem nen hnathawh tawh chin hrang hrang an sawifiah.

Sorkar thuchhuah tarlan danin, tunah hian Mizoramah oil block pahnihah ONGC leh Oil India ten hna an thawk mek. ONGC hian Meidum leh Zanlawnah lei verh hna an zo tawh a, Meidumah gas deposit eng emaw zat hmuh tawh. Oik India chuan Maubuanga an leiverhah gas tlem azawng an hmuh tawh bakah, Keifangah lei an verh leh mek a ni.

Mizoram South Block (sq.km. 3619)-a oil leh gas zawn nan hian global tender chhuah tura hmalak mek a ni a, forest clearance leh clearance dangte tihfel a ni tawh a; hei hi Ministry of Petroleum & Natural Gas-ah thehluh a ni tawh.