Dy Mayor hoin lawmthu sawina hun hmang

Aizawl Municipal Corporation (AMC) term kal mek (2015-2020) chu nizan zanlaiah a tàwp dawn avangin deputy mayor Lalringliana leh a personal branch-a thawkte chuan tluang taka AMC term an hman zawh avanga lawmthu sawina inkhawm, nimin khan a pisaah an hmang.

Lalringliana chuan, duhthusam ang diak diakin thil kal vek lo mah se, khawpui hmasawn nan theihtawp an chhuah tih a sawi a, "Pathian kaihhruaina nasa tak kan dawn avang leh mipui thlàwpna kan dawn avangin lawmthu ka sawi a, tih fuh tâwk loh kan neihah mipui hriatthiamna ka dil nghal a ni," a ti.

AMC Deputy Mayor chuan, kum 5 chhunga AMC hmalakna leh a bial chhung bika hnathawh langsar zual a sawi lang a; Aizawlah mipui him zawk nan Bawngkawn leh Kulikawn inkarah footpath eng emaw zat siam a nih thu te, local council house 74 sak a nih thu te, Zonuamah Eco Park siam a nih thu te, Tuikualah Multi Level Parking cum Market an siam thu te, bawlhhlawh mumal zawka thliarin an senghawi thute a sawi.

AMC Ward-II chhung bikah, Chan­mari-Chaltlang footpath siam leh kawng zauh a nih thu te, Bawngkawnah Multi Level Parking sak a nih thu te, Bawngkawn AMC Road siam a nih thu leh, hmun hrang hranga footpath, side drain leh step siam a nih thute a sawi bawk.

Lawmthu sawinaah hian Lalringliana bial, ward no. II chhunga Bawngkawn bialtu pastor Rev. RC Lalnghakliana'n lawmthu sawi ṭawngṭaina hun a hmang a ni.