Mizoram quota-a MBBS leh BDS zir turin NEET paltlang a ngai tawh dawn
Supreme Court thupek avangin state sorkarin technical zirtur thlanna atana examination a buatsaiha tlingte'n MBBS leh BDS an thlang thei tawh dawn lo a; MBBS leh BDS zir turin National Eligibility Entrance Test (NEET) paltlang a ngai tawh dawn. Hetih lai hian, Supreme Court ruling hi khin lêt mek a ni.
Mizoramah chuan Mizoram quota-a technical course zir tur thlanna atan State Medical & Techincal Examination (SMATE) buatsaih ṭhin a ni a, an tih ṭhat dan indawtin an zir duh an thlang ṭhin. Mahse, Supreme Court thupek avangin kuminah chuan SMATE-a ti ṭhate MBBS leh BDS an thlang thei tawh dawn lo a, NEET-a an tih ṭhat a ngai tawh dawn.
Supreme Court thutlukna hi state ṭhenkhatin an khin let (appeal) avangin nimin khan ngaihtuah ṭhat a ni a, thutlukna siam a nih dan kan hre hman lo. Mizoram sorkar pawhin Court thutluk dan hi ṭha an tih loh thu sorkar laipuiah thlen a tum.
Supreme Court ruling hi April 29, 2016 khan tihchhuah a nih laiin, NEET 2016 chu May 2, 2016 khan buatsaih a ni. Court ruling a awm tak avangin NEET chu thawh hnih (two phase)-a buatsaih a ni dawn a; Phase-II chu July 24, 2016-ah buatsaih a ni ang. Phase-I leh Phase-II te chu kaikawpin, August 17, 2016-ah a rualin result tihchhuah tum a ni.
Vanglaini zawhna chhangin Higher & Technical Education department hotute chuan, May 24, 2016-ah SMATE an buatsaih dawn thu an sawi a, "Court ruling hi ding tlang pawh ni se, thil dang tam tak Mizoram quota-a zir tur thlan a ngai tho a. Tun dinhmunah chuan zirlaite tana ṭha ber chu SMATE leh NEET hmachhawn ve ve a ni," an ti.
Nikum khan Mizoram sorkarin MBBS-ah quota - Central pool-ah 25 leh NEC-ah pathum, BDS-ah quota Central pool-ah pathum leh NEC-ah pasarih a nei a ni.
Supreme Court ruling avang hian engineering lamah chuan thil thar a awm dawn lo. Hetih lai hian, HTE department hotute chuan, engineering line chu Mizoah a tlak nat vak tawh loh thu sawiin, "Nikum pawh khan diltu an awm loh avangin seat eng emaw zat chu kan hnawhkhat thei lo a ni," an ti.