V/C-te'n zangnadawmna phûtpui tum lo

Serchhip -III Village Council-te'n NH-54 four lane-a zauh turah zangnadawmna vanga harsatna a thlen loh nan an huam chhunga ram neite'n zangnadawmna phût an tum a nih pawhin, hriatpuina ziahsak (recomend) an tum lo.

Serchhip-III V/C-te May 2, 2016 zinga VCP PC Siamliana ṭhukhawm chuan, Mizoram hmar lam leh chhim lam inkalpawhna kawngpui pawimawh ber ni tur zauh tura hmalak mekah zangnadawmna tam tham tak phût tuma hmalakna awmin an hria a; Mizoram hmun tam takah zangnadawmna phût vangin hmasawnna hna thawhin a khaihlak phah a, hna thawhna tur zat deuh thaw zangnadawmna atana hman a ṭul ṭhin ang chu Mizoram ram laili paltlanga kawngpui zauh turah thleng ve lo se an duh thu an sawi.

Serchhip-III V/C-te chuan, kawngpui zauhin a paltlang turah huan, lo, ram nghet leh in hmun nghet hmun ṭhenkhatah awm mah se, ram âwl, thlai engmah awm lohna pawh thlai tam tak awmna, ram hlu tak anga ziaka zangnadawmna tam tham tak lak tumna awma an hriat thu an sawi a; chutiang thil tite chu an huam chhungah an awm loh nan hmalak an rel a ni.

Serchhip-III V/C-te chuan, an huam chhung mipuite chu sorkar mi emaw, dan lama mithiam tute emaw zangnadawmna phût tura hmalakpui tum dawrtu an nei a nih pawhin, an lakah fimkhur a, zangnadawmna dik lo lak tum lo turin an ngen a; heng thil chungchang hi remchang hmasaah mipuite hriattir turin vantlang inkhawm neih an rel bawk.

Mimal tute emaw rama kawngpui pawimawh a kaltlang a nih chuan, ram ṭha tling lo pawh ram ṭha tak leh hlu tak a ni thei dawn tih sawiin, Serchhip-III V/C chuan, zangnadawmna la kher lo pawhin ram neitute tan chhenfâkawm leh in sakna atan pawha hmun ṭha tak a la nih dawn tho avangin, mipuite chu thil awmzia hrethiam a, ram leh hnam, khawtlang leh sorkar tana malsawmna nih tum turin an ngen a ni.