Dan loa meizial lak luh tihbo tum Joint Operation on Illegal Tobacco Products din

State páwn aṭanga Mizorama dan phal loha meizial lut ṭhin tibo tura beihpui thlakna tur, Joint Operation on Illegal Tobacco Products (Contraband Cigarettes) chu nimin khan IPR directorate conference hall-ah chief minister Lal Thanhawla'n a hawng.

CM Lal Thanhawla chuan, dan phal loa meizial Mizorama rawn lut a huhoa ûmbona tur duan a ni chu lawmawm a tih thu sawiin, "Kan ṭhenawm ram Myanmar hi a lo zalen chhoh takah hian India hian a hausakna hi hlâwkpui a duh. Insumdawn tawnnaah pawh dan phal loh bungrua, sikret thlengin tam tak a rawn inzep tel ngei dawn a, hei hi engtin nge kan lo hmachhawn ang a, kan lo inpuahchah ang tih ngaihtuah a ngai hle," a ti a; hlauh thama thawh tlân a ngaih thu a sawi.

Mizote'n pipute aṭangin meizûk chu thosi leh rannung ûmbona atan an ti ṭhin tih sawiin Chief Minister chuan, "Ringtu kan nih angin meizûk ṭhat lohzia hre ber tur kan nih laiin, a uar ber kan ni hi a pawi hle a ni," a ti.

Indian Society on Tobacco & Health, Mizoram Chapter president Lal Riliani pawhin thu sawiin, "Mizoramah vaihlo leh a kaihhnawih hmang 67% kan awm. Vaihloah hian chemical ṭha lo chi tam tak a awm a, 80% vel hi cancer thlen thei a ni," a ti a; vaihlo chu mihring hriselna tichhetu a nih thu a sawi.

Inkhawmah hian DGP Lalthianghlima Pachuau leh CID (Crime) SP Lallianmawia te pawhin thupui thlan bik hmangin thu an sawi.

Kick off programme hi Supply director R Lalramnghaka'n kai-hruaiin, chawhnu lamah Mizoram State Tobacco Control Society (MSTCS) nodal officer Dr. Jane R Ralte kaihhruaina hnuaiah thil pawimawh hrang hrang sawiho a ni.

Joint Operation on Illegal Tobacco Products (Contraband Cigarettes) hnuaiah hian department hrang hrangte'n a huhoin dan phal loh Mizorama meizial lo lutte a rêm theihna atan ṭan an la dawn a ni. COPTA, 2003 section 7 chuan cigarette kawma ciggarette zuk vanga cancer vei thlalak langsar taka tihlan a phut a ni.