Sumdawnna lirtheite tan chhiah Ṭum 3 peka tlak theih turin ruahman

Mizoram sorkar chuan sumdawnna lirthei (commercial vehicle) aṭanga chhiah lak, life time tax, vawi khata kum 15 atana pek tlak nghal chu vawi thum peka pek tlak theih turin a ruahman mek.

Transport department-in May 2, 2016-a Circular a chhuah danin, The Mizoram Motor Vehicle Taxation (Amandment) Act 2015 hman meka sumdawnna lirtheite aṭanga life time tax, ṭum khata kum 15 chhung atana pek nghal tura tih chu tihdanglam tum mek a ni a; ṭum khat, ṭum hnih leh ṭum thuma pek tlak theih tura ruahmanna siam niin, he ruahmanna hi Law & Judicial department-in an endik mek.

Transport department circular-ah chuan, "He ruahmanna hi Assembly session-ah pass a nih hma pawha hman thuai a nih theih nan Ordinance turin chak taka hmalak a ni. He dan siamṭhatna hi hman theih a nih hma chuan commercial vehicle-te hi tax pek chungchanga ngaihhnathiam an ni ang," tia ziah a ni.