DIG (NR) chhungah thubuai ziah luh a pung

Mizoram police-a DIG (Northern Range) LT Hrangchal hoin ni-min khan a pisaah police northern range huam chhunga thubuai chung-chang thlirletna, quarters crime review meeting neih a ni a, January-March 2016 chhungin thubuai ziah luh a pun thu tarlan a ni.

Meeting-a tarlan danin, kum khata thla hmasa pathum, January-March chhungin kum 2015 aiin 2016-ah thubuai ziah luh a tam zawk. Kum 2015-ah thubuai 499 ziah luh a nih laiin, kum 2016-ah chuan thubuai 621 ziah luh a ni a; nikum aia kumina thubuai ziah luh a tamna chu 122 a ni. Kumina thubuai ziah luh zingah hian hmeichhe kum tling lo pawngsual leh khuaikhem thubuai 39 a tel a, hei hi nikum aiin a tam zawk daih a ni.

Thubuai ziah luh tamna ber chu Aizawl district-ah niin, thubuai 398 ziah luh a ni a, thubuai ziah luh tlemna ber chu Serchhip district-ah niin, thubuai 35 ziah luh a ni.

Mizoram police-a northern range hian Aizawl, Champhai, Serchhip, Mamit leh Kolasib district a huam a, southern range-in Lung-lei, Lawngtlai leh Saiha a huam thung.