KHAWTHLIR

Petrol man

Tun hnai khan India ram pumah petrol leh diesel man tihsan a ni a, Mizoramah pawh petrol leh diesel man thar tur bituk nghal a ni. Petrol chu litre khatah Rs. 1.06 a tihsan a ni a, diesel chu litre khatah Rs. 2.94 a tihsan a ni. Petrol extra premium chu petrol pangngai aiin litre khatah Rs. 2.99 in a to.

MHIP-in dem

MHIP general headquarters chuan thuchhuah siamin, mahni nupui thattua puh Lalremruata Ralte-in bail-a chhuah a nih mek laia a nupui chhungte ina a kal leh thlabar taka a siam chu an dem thu an tarlang a; Lalremruata chu a na thei ang bera hrem ngei an phût. Zarkawt khawtlang hruaitute'n Zohmangaihi chhungte thlavâng an lo hauhsak chu lawmawm an tih thu leh an hmalakna chu a tawp thlenga an thlàwp dawn thu an tarlang.

MAHCO training

Sorkar laipuia Ministry of Textiles bultumin May 2, 2016 khan Mizoram Apex Handloom & Handicraft Cooperative Society Ltd (MAHCO) chuan Hotel Rajj, Aizawlah training an buatsaih. Training hian ni 45 a awh dawn a, mi 20 an tel a ni.

Hnathawh enfiah

Champhai DC Vanlalngaihsaka chuan tun hnai khan Ngopa RD block leh Champhai RD block huam chhunga Border Area Development Programme (BADP) hnuaia hna thawh hrang hrangte a hmunah tlawhin a enfiah a, khawtlang hruaitute a kâwm bawk.

Thingin delh hlum

Liansiama (63, Khuanghlum, Pangzawl chu May 2, 2016 tlai khan an ramkalnaah thli tleh vanga thing tluin delhin a delh a, a hmunah a thi. Liansiama hi a nupui nen huanah an kal a, thli a tleh avangin sahimna zawngin an tlanchhia a, an tlanchhiatna lamah thing tluin a delh a ni.