Serchhip DC leh Serchhip YMA hruaitute'n Tuihna leh nungcha humhalh dan tur sawiho

YMA sub-headquarters, Serchhip hruaitute chuan May 2, 2016 tlai khan Serchhip DC Dr Lalrozama a pisaah an kâwm a; tuihna leh nungcha humhalh tura thawhho dan tur an sawipui.

Serchhip DC chuan, YMA-in ram leh khawtlang hma ngaia ngaihtuahna an sêng chu fakawm an tih thu sawiin, "Khawtlang
ṭangrual duh dana ke pên a nih phawt chuan an hlawhtling ngei ka ring. Ṭhahnemngaih luat tuk vanga petek sual palhna lakah erawh inven thiam a, YMA inrawlhna tur chi leh chi loh thliar thiam a ṭul hlein ka hria," a ti.

Serchhip YMA hruaitute chuan, an district chhunga tuihna a tlem chak chu an vei thu sawiin, lui hnár leh lui dunga thing phun uar ṭula an hriat thu te, thingphun tawh sa enkawl uluk ṭula an hriat thu te, lui dunga nungcha humhalh kawngah lui dung humhalhtu khaw hrang hrangte inkhuangrual deuh hleka kal ṭhaa an hriat thute leh, ngaw thar siam ṭura ṭan lak ṭul an tih thute DC hi an hrilh a ni.

YMA thu thlente chu a kaihhnawih department hrang hrangte nena sawiho a ṭha a tih thu sawiin Serchhip DC chuan, sawihona hun buatsaih a nih theihna atana hma a lak tur thu YMA hruaitute a hrilh.

Serchhip YMA hruaitute chuan MLPC Act, 2016 Sec 42 leh 43 khauh zawka ken ṭula an hriat thu te, tribal certificate leh residential certificate pekchhuah chungchanga fimkhur chhunzawm zel pawimawh an tih thute pawh DC hnenah hian an thlen a ni.