MPC party-in rualawh thlak an ti

MPC party chuan thuchhuah siamin, kum 2015-16 ah kawlphetha lei nan cheng vbc. 210 vel hman a ni chu lung-chhiatthlak ah tih thu an tarlang a; hydel project-a Mizoram ṭhenawm state-te dinhmun enin, rualawh thlak an tih thu an sawi.

MPC thuchhuah chuan, Brig. T Sailo kaih-hruai PC sorkar-in kum 1978 aṭanga 1984 thleng Bairabi Hydel Power Project an buaipui tawh, sorkar laipui pawhin techno-economic clearance an pek tawh chu a hnua sorkarna chelhte'n chhunzawmin tihlawhtling se chuan, Mizoramin kawlphetha megawatt 160 a nei tawh ang a, kum tin cheng vbc. 500 aia tam lut thei tawh tur a nih thu a tarlang a, "Lal Thanhawla kaihhruai Congress party leh MNF sorkarin an chhunzawm loh vanga kum 2015-16 ah kawlphetha lei nan cheng vbc. 210 vel hman a ni hi lungchhiatthlak kan ti tak zet," an ti.

MPC tarlan danin, Mizo-ram ṭhenawm state zingah, Sikkim-in megawatt 8,000 an nei dawn hnai tawh a, Arunachal Pradesh-in megawatt 50,000 nei turin an lui liante an khuap mek. Assam, Mangha-laya leh Manipur aṭang-in Mizoramin kum tin megawatt tam tak leiin cheng tam tak a lo sêng tawh a ni.

MPC party chuan, "Ṭhenawm state-te'n hma-sawnna lamah chak taka hma lam pana ke an pên mek laia electric power-a intodelh lo ber ram, leiba ngah ber, state pachhe bera min hûngtu Congress leh MNF party-te hnâwl a, Zoram dinchhuahna leh intodelhna hnukpui policy neitu leh kalpui mektu MPC party-ah rinna nghat a, Congress ni lo, MNF ni lo sorkar siam turin mipuite kan sáwm a ni," an ti.