KHAWTHLIR

Synod Revival Committee chuan nizan aṭang khan Mission Veng Kohhran biak-inah Revival Live TV Crusade an buatsaih ṭan a, local TV channel-ah live-a pek chhuah a ni. Crusade hi a thawh khatna chu December 9-13 chhungin neih a ni dawn a, December 23-27 chhungin a thawh hnihna neih a ni ang. Crusade hun chhunga Pathianni leh Krismas ní bikah chuan chhun lamah pawh dar 12-ah hun hman a ni bawk ang. 

State Referral Hospital-ah Covid-19 vei mi 17 enkawl mek an ni a, ICU-ah pakhat enkawl niin, mi dang zawng Isolation ward-ah an awm. SRH-ZMC Bulletin tarlan danin, ICU-a awm bakah, ward-a awm mi pathum chu oxygen pek mek an ni. Nimin khan hripui laka fihlim tawh pakhat, kum 87 mi chhuahtir a ni.

Kolasib-a Conservator of Forests office chuan dan loa Mizorama rambâl (scientific name: Paris Polyphylla) lâk luh tumte aṭanga an man chu nimin khan an hâl ral. Rambâl hâl ralte chu September 29, 2017-a man niin, kg. 103-a rit a ni a, Mizoram Forest Act, 1955 tlawhchhana tihral a ni.

Social Welfare minister Dr Beichhua chuan nimin khan State Social Welfare & Rehabilitation Centre-ah puanṭhui leh computer zirna tihchangtlunna a hawng. Oil India Ltd. chuan CSR aṭangin State Social Welfare & Rehabilitation Centre hi puanṭhui leh computer kaihhnawih zirna hmanrua an pe a ni.

Champhai district tana electoral roll observer R Zarzosanga chuan nimin khan Champhai a tlawh a; bawrhsap Maria CT Zuali hoin official leh political party aiawhte DC conference hall-ah a kâwm a, electoral roll ennawnna kalpui mek chungchang a sawipui a ni.

Information & Public Relation department leh Mizo Photographers’ Society chuan nimin khan IPR Auditorium-ah Photography Workshop an buatsaih a, IPR director Lallianpuii'n a hawng. Workshop-ah hian ni hnih chhungin thlalak kaihhnawih thil chi hrang hrang inzirtir a ni ang.