ZPM Candidate-in criminal complaint a thehlut

Eirûknaah a tel ve anga social media kaltlanga thu thehdarh a nih avangin Lok Sabha MP inthlan tura ZPM candidate Richard Vanlalhmangaiha chuan nimin khan Aizawl District Court-a chief judicial magistrate Lalrochami Ralte hnenah criminal complaint a thehlut.

Richard Vanlalhmangaiha'n thu dik lo hmanga amah timualphotu, criminal complaint-a a ziah lante chu - David Sailo (Facebook) te, YouTube channel Tuesday Nightmare neitu Lalrammuanpuii Izu w/o Alex Chimezie Izu, Mamit (permanent address) leh, Tlanghmingthanga s/o ML Ṭhuama (L), Mission Vengthlangte an ni.

Criminal complaint a thehluh zawha thuthar thehdarhtute zawhna chhangin Richard Vanlalhmangaiha chuan, cirminal complaint a thehluh chhan chu social media-ah dik lo taka puh a nih avanga thu dik hai lan a duh vang a nih thu a sawi a, "He thilah hian 100%-in ka fihlîm a, ka kutah hian pawisa pakhat mah a lut lo. A pawimawh lai ber chu, pawisa kha khawiah nge a luh tih a ni a, keima kutah cheng khat mah a lut lo," a ti.

Richard Vanlalhmangaiha chuan, an office-in pawisa an dawng tih sawiin, "A dawngtuah khan kan lo witness kha a ni a, pawisa kalna kha Anti Corruption khan an chhui a, keimaah cheng khat mah chhui luh tur a awm loh avangin kei kha chu ka him a ni," a ti a; eirûk thubuaia hrem a nih ve loh chhan a sawi.