BJP kaihhruai sorkar paihthla turin Congress President-in mipui a ngen

Mizoram Pradesh Congress Committee (MPCC) president Lal Thanzara chuan, Mizo ram, hnam leh sakhua humhima a awm theih nan sorkar laipuia BJP kaihhruai sorkar paihthla turin mipui a ngen.

Lal Thanzara hian nimin khan Aizawl Press Club-ah thuthar thehdarhtute a kâwm a; "Kan ram, kan hnam leh kan sakhaw humhima a awm theih nan leh central-a BJP sorkar paihthlaka a awm theih nan political party-a kan nihnate dahṭhain Pu Lalbiakzama hi Parliament-a kan ram leh mipui tana ding turin vote hlu tak pea min vote pui turin Mizoram mipui ka sáwmin ka ngen a che u," a ti.

MPCC President chuan, Lok Sabha inthlanpui neih tur chu India ramah democracy chawi nunin a awm dawn nge, mipui zalenna rahbeha awmin, mimal thuneihna (autocracy) hnuaiah an lut dawn tih a hril dawn niin a sawi a, "Mipui zalenna rahbehna hmanruaa sorkar institution hmansualna hi Pu Narendra Modi-a kaihhruai NDA sorkar hnuaiah a zual zawngin chak takin a kal zel," tiin, NDA sorkarin CBI, Enforcement Directorate, Income Tax leh a dangte hmangin mipui zalenna nasa taka an rahbeh thu a sawi.

Sakhaw zalenna chungchang sawiin Lal Thanzara chuan, "NDA sorkarin tun kum 10 kal ta chhunga kan sakhaw zalenna nasa taka min rahbehsak leh a zual zawnga a kal zel dan a taka hmutute chu kohhran hrang hrang leh mission field-a thawkte an ni," a ti.

Lal Thanzara chuan, "Kan ram, kan hnam leh kan sakhaw him nan central-a BJP kaihhruai NDA sorkar hi paihthlak a ngai a ni," a ti a, chutiang tur chuan Congress MP candidate thlan tlin a ngaih thu a sawi.

MPCC President chuan, Congress party candidate Lalbiakzama chu MPS a nih anga Mizoram sorkara kum 32 a thawh chhunga hmingṭha leh chhuanawm, fel, hmangcháng hria leh huaisen a nih thu a sawi a, "Amah tluk tur MP candidate dangte zingah an awmin kan hre lo," a ti.