KHAWTHLIR

Ruihhlo man

Central YMA hnuaia Kumpuan Committee chuan April 14, Pathianni khan heroin Tictac bûr 17, Alprazolum mûm 126 leh Codeine (khuh damdawi) bûr 400 an man a, ruihhlo an man kaihhnawihah mi pakua an man bawk.

Kuhva phurh khap

Aizawl DC Nazuk Kumar chuan nimin khan thupek chhuahin, Aizawl district-ah dan loa kuhva phurh khap a nih thu a tarlang a, "Aizawi district khawi hmunah pawh danin a phal bak kuhva leh bungrua reng reng lak luh leh phurh phal a ni lo," a ti. Thupek bawhchhia chu IPC Section 188 hmanga hrem theih an ni.

Vote thlaktir

Khawzawl district-a Tualte khuaah nimin khan April 8-9, 2024 chhunga home voting neih laia awm lo mi pakhat chu inthlan buaipuitute'n an inah kal chilhin vote an thlaktir. Khawzawl district-ah hian April 8-9 khan home voting tih niin, mi 107-in vote an lo thlâk tawh a ni.

MZU-ah workshop

Mizoram University-a Social Works department chuan nimin aṭang khan ‘Psychosocial adaptation, disaster mitigation and preparedness of climate change-affected communities’ tih thupui zirhona international workshop an buatsaih a, MZU registrar Prof. Lalnundanga'n a hawng. Zirhonaah hian Evaluation and Research, CVT, Denver, Colorado-a director Dr Courtney Welton-Michelle chu khualzahawm a ni a, vawiinah chhunzawm a ni ang.