Service Day cum Martyrs' Day hmang

April 14, Pathianni kha India ramah National Service Day cum Martyrs' Day a ni a, Champhai Fire Station chuan an pisa kawtah an hmang a, India rama kum 2023 chhunga kâng ṭhelh pawl, kâng ṭhelhna vanga thi mi pathum sùnna hun an hmang.

Champhai Fire Station officer F Lalchhandama chuan, tunlaiin khua a lum bakah a ro thu a sawi a, "Mipuite kângmei lakah kan fimkhur a ngai. April 1, 2023 leh March 31, 2024 chhungin Champhai Fire Station-in kângmei chhuah hriattirna (fire call) ṭum 23 a dawng. In, dawr leh thlám kàng vangin ṭum riat lai kan chhuak a, he'nga kângmei chhuak vanga bungraw kâng ral hlut zawng chu Rs 9,86,000 a ni," a ti.

F Lalchhandama chuan, chenna in tana hlauhawm, dái hnai kâng ṭhelh turin ṭum 15 an tlan chhuah thu a sawi a; kângmei a chhuahin Champhai Fire Station number 03831-234026 emaw, 7628029288 emawah hriattir vat zel turin mipui a ngen.

Kum tin April 14-20 chhungin 'Kângmei lakah fimkhur la, ram tan thâ thawh ve rawh' (Ensure fire safety, contribute towards nation building)' tih thupui hmangin Fire Service Week hman ṭhin a ni a, kumah pawh hman leh tur a ni.

Fire Service Week pual hian Champhai Fire Station chuan sikul leh damdawi-in ṭhenkhatah Fire Safety Training cum Fire Safety Inspection an buatsaih dawn a ni.