MP atan rorel lai party an ṭha ber - ZPM Candidate

Lok Sabha inthlan tura ZPM candidate Richard Vanlalhmangaiha chuan, rorel lai sorkar thâ tichak turin MP atan rorel lai party an ṭha ber nia sawiin, amah thlan tlin a nih chuan Mizoram sorkar tan leilâwn rinawm tak ni tura a inpek thu a sawi.

Richard Vanlalhmangaiha hian nimin zing khan Sihphir leh Kawnpui inkara khaw hrang hrangah vantlang inkhawm neiin thu a sawi a, "Rorel lai sorkar thâ tichak tur hian MP atan rorel lai party bawk an ṭha ber tih hi tun hma aṭanga kalphung lo awm sa a ni. Min thlang tling a nih chuan Mizoram sorkar tan leilâwn rinawm tak ni turin ka inpe a, ka theihna leh chaknate he ram tan hian nasa lehzualin ka hmang thei dawn a ni," a ti.

Pathianin rorelna fawng chelhtu atan ZPM a ruat mek tih sawiin Richard Vanlalhmangaiha chuan, "Hei hi kan fel leh ṭhat bik vang a ni lo a, Zoram mipui tana Pathian hun ruat lo inher chhuak a ni," a ti a; vote thlak ṭheuh tur leh MP atan amah vote turin Mizoram mipui a sáwm.

ZPM star campaigner B Lalchhan­zova, minister of state pawhin thu sawiin, "ZPM candidate Pu Richard-a hi mahni infakmawi chi a ni lo a, mahse, mi rintlak a ni tih chu a chenna veng mipuite'n an hria a, kan hotute pawhin an dintir a ni," a ti.

B Lalchhanzova chuan, chief minister Lalduhoma kaihhruaiin sorkarah thil tam tak siamṭhat mek a nia sawiin, "Sorkar hnathawk hlawh lâk hun hma ta te, health care bill táng pek vek te, êng chhit man ba rulh zawh te, tar pension tihsante bakah, department hrang hrangah thil dik lo siamṭhat mek zel a ni," a ti a; thil thar an tih zel dawn thu a sawi.