Tu tan pawha thawhpui theih MP nih ka tum - K Vanlalvena

Lok Sabha inthlana MNF candidate K Vanlalvena chuan nimin khan Mizo Hnam Rûna inkhawmah thu sawiin, tu tan pawha thawhpui theih MP nih a tum thu leh, Mizo ṭhalai, eizawnna mumal nei lote tan hmalak a tum thu a sawi.

K Vanlalvena chuan, "Lok Sabha MP atan ka tling a nih chuan ruling party-te hian min thawhpui duh phawt chuan an MP candidate ai hian ka ṭangkai daih zawk mai thei a nia. Tu tan pawha MP thawhpui theih nih ka tum a ni," a ti.

Mizo ṭhalai zingah eizawnna mumal nei lo tam tak an awm tih a hriat thu sawiin Vanlalvena chuan, "Chu'ngte tan chuan theihtawp chhuaha hmalak ka tum a, Mizo ṭhalai, sport, music, art leh thil hrang hranga talent ṭha tak tak neite hian an talent hmanga ei an zawn theih dan tur theihtawpa dappui ka tum," a ti a; hmun hrang hranga awm Mizote inpumkhatna turin theihtawp chhuah zel a tum thu pawh a sawi.

K Vanlalvena chuan, Mizoram mipui vote thlak ṭheuh tura sáwmin, "Min vote lo tur pawhin vote thlak vek ang u, democracy ram kan nih angin chu chu a hlu hle a ni. Huatna, khâknate tel loin, rilru thianghlim takin ṭawngṭaina nen i campaign zel ang u," a ti.

MNF treasurer Lalruatkima pawhin thu sawiin, "Pu K Vanlalvena hi nationalist rum rût mai, kohhran upa, Pathian ṭih mi a ni a, Parliament chhung leh páwnah na taka Mizo hnam leh sakhaw tana huaisen taka lo tâl tawh ṭhin a ni," a ti a, MNF candidate chu Mizo hnam, ram leh sakhuain nêkna nasa tak a tawh laiin Mizoramin a mamawh niin a sawi.