Bawnghnute sawngbawlna hmun endik

Champhai District Cooperative Development Committee (DCDC) chuan nimin khan chairman James Lalrinchhana, bawrhsap hoin Champhai District Milk Producers’ Cooperative Union Limited (CHAMUL) hmunhma leh hmanraw neihte an enfiah.

Hun rei tak chawlhsan tawh CHAMUL hmunhma leh a chhunga bungruarte chu DCDC hotute'n an endik a; hmunhma leh bungrua awmte tihfai thuai ni se, electric pawh luhna line hrang hrang inthlun zawm dan leh bawnghnute sawngbawlna khawlte chu mithiam zawkte ruaia enchhin ni se, an ti. Endikna aṭanga a dinhmun azirin hmalak chhunzawm lehzel dan tur ngaihtuah leh an rêl a ni.

Sorkar thuchhuah tarlan danin, CHAMUL hian kum 2010-11 aṭang khan primary cooperative society member-te aṭangin bawnghnute la khawmin, Champhai leh a chhehvela hralh leh turin bawnghnute an siam ṭan a; January 23, 2014-ah pasteuriser leh packing machine a chhiat avangin kum khat chuang chawlh lailawk a ni. November 2015 aṭangin bawnghnute lak khawm leh a ni a, kum 2017 tir lam aṭanga tun thlengin hman chhunzawm loha dah a ni.