Observer-in inthlan inbuatsaih dan a sawipui

Mizorama Lok Sabha inthlan tura police abserver K Satyanarayana chuan nimin khan Serchhip DC meeting hall-ah inthlan kaihhnawih sorkar hotute inthlanpui neih tur chungchang a sawipui a; ruihhlo leh ralthuam tawlhrûk lakah invên fimkhur a ṭul thu a sawi.

K Satyanarayana chuan, Mizoram chu ram ralmuang, mipui mimirin dan an ngaih pawimawhna hmun a nih thu a sawi a, "Inthlanpui awm tur pawh harsatna awm loa tluang taka zawh a nih theih ka beisei. Mizoram hi international border-a awm a nih avangin ruihhlo leh ralthuam tawlhrûk awm thei lakah inven fimkhur a ṭul a, dan leh thupek kengkawhtu police-te'n theihtawp chhuaha ṭan an lak a ṭul," a ti.

Serchhip district election officer David Lalthantluanga, bawrhsap pawhin thu sawiin, inthlanpui atana inbuatsaih dan a sawifiah. Serchhip SP MS Dawngkima chuan, dan leh thupek kenkawhna leh venhimna lamah inbuatsaihna peih a nih tawh thu a sawi.