K Vanlalvena a ṭha lawr lak dawn - Dr R Lalthangliana

MNF senior vice president Dr R Lalthangliana chuan, MP nih anga Mizoram mamawh hrang hrangte bawhzui turin MNF Lok Sabha candidate K Vanlalvena a ṭha lawr lak dawn niin a sawi.

Dr R Lalthangliana hian nimin khan Hrangturzo bial chhunga khaw hrang hrang a tlawhnaah thu a sawi a; K Vanlalvena chu Mizoram ṭhalaite eizawnna leh infiamna lama mamawh te, kut hnathawktute dâwmkânna tur te, khawpui leh thingtlanga cheng mi harsate mamawh phuhrûkna tura ruahmanna siamte bawhzuitu atan a ṭhat lawr lak tur thu a sawi a ni.

K Vanlalvena nen Mizorama district 11 leh MLA bial 40 an tlawh chhuak tawh tih sawiin R Lalthangliana chuan, "Pathian zarah kan boruak a ṭha a, hlawhtlin ngei pawh kan inbeisei a, a hlawhtlinna erawh chu Pathian thu thu a ni. Pu Vena hi a nihnaah a chiang a, nihna hian mawhphurhna a keng tel tih hre chiangtu a ni," a ti a; K Vanlalvena vote turin mipui a sáwm.