Saitual district-ah phal loh thil cheng nuai 70 hû man tawh

Saitual SP Pukhraj Kamal Gupta chuan nimin khan a pisaah thuthar thehdarhtute a kâwm a; Lok Sabha inthlan puan a nih aṭangin cheng nuai 70 hû dan phal loh thil an man tawh thu a sawi.

Pukhraj Kamal Gupta chuan, Saitual police leh security lam hrim hrim an inpuahchah ṭhaw tâwk niin a sawi a, "Inthlan puan a nih aṭangin dan phal loh thil cheng nuai 70 hû kan man tawh a, chu'ngte chu rakzu litre 420, zu siamna hmun, heroin gram 155.8, ganja kg. 4.8 leh kuhva ip 1,277 a ni," a ti.

Saitual district-ah critical polling station panga a awm thu sawiin Saitual SP chuan, "Mimbungah pahnih, Khawlianah pahnih leh NE Tlangnuamah pakhat a ni a, heng polling station-ah hian ITBP section khat ṭheuh dah a ni," a ti a; Saitual district-a silai license 398 endik niin, 94 chu an silai tunsak a nih thu a sawi.