ZPM President-in vote thlak turin Mizoram mipui a sáwm

ZPM president Lalliansawta chuan, vote thlak chu India khua leh tuite mawhphurhna a ni tih sawiin, Lok Sabha inthlanah vote thlâk vek turin Mizoram mipui a sáwm.

Lalliansawta hian nimin khan ZPM pisaa inkhawmah thu sawiin, "MP inthlan awm turah Mizoram mipui vote nei zawng zawngte vote thlak vek turin ka sáwm a, India khua leh tui kan nihna leh ringtu kan nih angin kan mawhphurhna hlen ṭheuh hi kan bat a ni," a ti.

Lok Sabha inthlanah MLA inthlanpui angin boruak a sang lo a, mipui an phûr tâwk lo ṭhin tih sawiin Lalliansawta chuan, "Chuti chung chung chuan ZPM thli a la tleh zel a, kan boruak a kâng hle. Candidate ṭha tak kan nei a, tlin pawh kan inbeisei sang hle. Viak ṭha leh mawngzâng tâwk chauh tura kum la naupang, tawnhriat nei ṭha leh ṭawng lamah pawh harsatna nei lo tur a ni," a ti a; ZPM candidate a tlin chuan Mizoram mipuiin an thlang sual dawn lo niin a sawi.

ZPM President chuan, Mizo lalte lal laiin lal ṭha lo hnuaiah chuan mipui an bet ṭhin tih sawiin, "Lal bàn a nih hnuah mipuite'n lal kan thlang ta a, kan thlan sual chuan hrehawm ti tur chu mipui kan ni," a ti a; "Mizo kan la tlem a, kan ṭan tlàn a, pheikhai rual taka kan awm theih chuan India rama vote tla percentage sang ber kan ni thei a, record siam turin ram mipui inbuatsaih ang u," a ti bawk.