Inthlan dawna an intiamnate buaipui turin ZPM Ṭhalai President-in CM Zorama a chah

Zoram Peoples' Movement (ZPM) ṭhalai president Malsawm­zuala chuan, chief minister Zoramthanga'n ZPM thlàwp MLA-te chung­chang a sawi chu ngaih huat tur a awm loh thu a sawi a; chutih rualin, Zoramthanga chu ZPM aiin MNF policy leh Mizoram mipui hnena a intiamnate buaipui zawk turin a chah.

Malsawmzuala hian nimin khan an party pisaah thu sawiin, Feb­ruary 7, 2020-a Mizo Hnam Runa inkhawma MNF president Zoramthanga'n ZPM party leh an thlàwp MLA-te chungchang a sawi chu chhangin, "Ngaih huata lâk tur a ni lo a, kalphung thar a la vàrpawh loh vang mai a ni," a ti.

ZPM party nasa taka a ṭhang lian zel chu MNF party-in mutmawh hnàrmawhah an nei mek tih sawiin Malsawmzuala chuan, "Kawng hrang hrangin beihna kan tâwk zel dawn. Heng min beihnate hi Zoram siamṭha tura chakna thar min petu a ni zawk," a ti a; CM Zoramthanga chuan an sorkar hmasakah a thutiam tam takte a tihlawhtling thei lo a nih pawhin, kum 2018 Assembly inthlan dawna a thutiamte erawh chu tihlawhtling ngei turin Zoram mipuiin an phût tih a sawi.

ZPM ṭhalai President chuan, political party hrang hrangin Mizoram khaichhuah nan an policy tihlawhtling turin theihtawp an chhuah ṭheuh tih sawiin, "MNF-in SEDP hnuaia cheng nuai thum aia tam sem, kawng chhâwng siam, etc. an nei a, Congress-in NLUP, NEDP, etc. an nei a, ZPM-in kut hnathawktute khaichhuah handholding policy, etc.-te kan nei," a ti. Mizoram mipuiin India rama state dangte politics inlumlet an ngaihven tawh tih sawiin, "Delhi CM Arvind Kejriwal-a'n an sorkar chhungin a party-in an intiamna a tihlawhtling lo a nih chuan AAP vote lo turin Delhi mipui a cho ngam a ni" a ti.

Dâwt leh thu puarpaw­léng hmanga party inbeihna titawp a, policy leh thu dik ṭan chhana Zoram siamṭha turin ZPM chuan hma an la zel dawn tih Malsawmzuala chuan a sawi bawk.