Kawlphetha man bá rulhna tur cheng nuai 8,169.49 pe chhuak

Mizoramin hmun hrang hrang aṭanga kawlphetha a leina man December 2023 thlenga a bat chin rulhna atan Finance department chuan April 12, 2024 khan cheng nuai 8,169.49 a pe chhuak a; kawlphetha leina atana ṭum khata sum pek chhuah tam ber a ni.

Thu dawn danin, kum eng emaw ti kal ta aṭangin Mizoram sorkarin kawlphetha leina man a ba ṭhin a, hun rei tak tak bat chángte a awm. December 2023 leh a hma lama kawlphetha leina man bá rulhna atan Finance department chuan Rs 81,69,49,255 a pe chhuak ta a ni.

December 2023 thlenga kawlphetha hman man ba rulhna turte chu - Central Power Generating Station aṭanga lâkna te, transmission company aṭanga lâkna te, Tuirial Hydel Project aṭanga kawlphetha lei tawhna man bá pek loh tling khawm te, February 2024 thlenga Vankal Solar Park aṭanga kawlphetha leina man bá pek loh tling khawmte a ni.

Kawlphetha leina man ba tling khawm rulhna tur pek chhuah a nih thu hi Finance enkawltu chief minister Lalduhoma chuan social media-ah a tarlang a, "Hei hi ṭum khatah kawlphetha leina atana sum pek chhuah tam ber a la ni. Power & Electricity department-in kawlphetha leina man pêk tlâkna atan thla tin Aizawl North Treasury-ah cheque an thehluh tangkhang mekte a zavaiin pêk tlâk vek a ni ta hi thil chhinchhiah tlâk tak a ni awm e," a ti.

Kum 2023-24 budget-a kawlphetha leina atana sum awm zat chu cheng vbc. 414.00 a ni tih sawiin Lalduhoma chuan, "Hei hi kum kal ta 2022-23 a bá la pek kim loh pek nan hman a ngaih tel avangin kum kal lai December 2023 thlenga Central Generating Station (CGS)-te aṭanga kawlphetha leina man pek nan a daih tâwk chauh," a ti a; 2023-24 sorkar kuma January-March 2024 chhung bika Mizoramin kawlphetha a hman ral tawh leina man chu kum 2024-25 budget aṭanga pek turin chak taka hmalak mek a nih thu a tarlang.

Lalduhoma chuan, "Mizorama hman tur kawlphetha leh a kalkawng transmission line hman mante a hun taka pek ngai loh vanga pek tlai man pek belh ziah ngai (late payment surcharge) ṭhin tihbo mai bakah, pek hun tiam chhunga pek theih vanga thla tinin chawhruala cheng nuai 40 vel pek ngai lo (rebate) zawk thei turin Mizoram sorkar chuan hma a la zel dawn a ni," a ti bawk.