ZPM Candidate-in Central-ah zawm a nei dawn lo - Chhanzova

ZPM star campaigner B Lalchhanzova, minister of state chuan nimin khan Aizawl Press Club-ah thuthar thehdarhtute a kâwm a; Lok Sabha inthlana ZPM candidate-in central-ah zawm a neih dawn loh thu leh eng party emaw zuk zawm kher neih ṭul anga mipui zirtir ṭhinte'n dawih­zepna chi an tuh mek nia a hriat thu a sawi.

B Lalchhanzova chuan, Parliament-ah central party zawm nei lo an awm ṭhin thu sawiin, "Party zawmpui nei lo MP 50 vel an awm. Kan zalenna, kan ram leh hnam tan a ṭhat ber dawn avangin keini chu Indian Constitution-in min phalsak angin, Speaker ruahmannain kan MP chu Parliament-ah a ṭhu mai dawn a, central party tu mitmei mah ven ngai loin nawr ngai leh hnial ngaite a hnial mai dawn a ni," a ti a; ZPM-in Mizoram tana an hmachhawpte an tihhlawhtlin theih nan Richard Vanlahmangaiha vote turin mipui a ngen.

Central-ah party dang zawm kher loin hma­sawnna a thleng thei tih sawiin Chhanzova chuan, "Mizorama ZPM sorkar hian central-ah zawmpui kan nei lo a, mahse, thla li vel chhungin central khuan thil ṭha ti tura min ngaih avangin blessing min pe nasa," a ti a; ZPM chuan zawmpui nei loa awm zel an tum thu a sawi.

B Lalchhanzova chuan, recognised party zinga central-a zawm nei ve lo party awm chhun chu ZPM chiah an nih thu a sawi a, "MNF chu BJP nen ṭanghoin NDA-ah feh kawng khat an zawhho a, ZPM MP candidate chu huaisen takin national party liante thuhnuaia kûn loin ram tan parliament-ah a tih tur a ti mai dawn. Tualṭo party-te hian Delhi tlangah zawmpui zuk neih kher a ṭul lo a, ṭha taka state sorkarin hna a thawh chuan central sorkar hi a thilphal em em a ni," a ti.

B LALCHHANZOVA SAWI ṬHENKHAT

☑ Thingtlang lamah ZPM thli a tleh na tawh hle.

☑ Mipuite'n min rin ngam ang ngeiin kan mawhphurhna hlen kan tum tlat a, mipui tan biak nuam ni tur leh inhawng turin hma kan la.

☑ Sum leh pai dinhmun siamṭha turin Chief Minister-in theihtawp a chhuah.

☑ Electric man ba, Health care bill táng, police-te TA/DA leh MR bill-te, sorkar hmasa aṭanga táng tawh chu pek vek tawh a ni.

☑ Old age pension atan ruahmanna siam a ni a, pension hlawh lak mai theih lohte leh GP fund lak harsa lutuk ṭhinte pawh a fel chho zel ang.

☑ ZPM chuan kan MP candidate hi ZPM auhla tuipuitu, CM kut ke ni thei tur tiin kan zuar.

☑ Party dang MP candidate-te chu ZPM auhla leh hmachhawp pawm ve lem lote an ni; Kalphung thar, mipui sorkar aupuitu party mi ngei MP atana thlan a ṭha ber ang.

☑ Kan sakhua leh hnam a him zel theih nan central-a zawmpui nei ve lo party MP neih hi kan ṭhatpui ber ang.