Speaker-in a hriattir angin RM Chakma a insawifiah

Tuichawng bialtu MLA Rashik Mohan Chak­ma chuan Legislative Assem­bly speaker Lalbiak­­zama'n MLA aṭanga bàn a nih loh chhan tur sawifiah tura a hriattir angin April 15, Thawh­ṭanni khan Speaker hnenah insawifiahna a thehlut.

RM Chakma insawifiahna chung­changa thil tih zui dan tur Vanglaini zawhna chhangin speaker Lalbiakzama chuan, "Kan dan hremite kan la ráwn ang a, a sensitive a, thil tih vut vut theih a ni lo," a ti.

Tarlan tawh angin, Assembly Speaker chuan Chakma Autonomous District Council (CADC)-a MDC Doymoy Daveng Chakma hnen aṭangin complaint a dawn avangin March 23, 2024 khan MNF MLA Rashik Mohan Chakma chu insawifiah turin a hriattir a, "CADC Chief Executive Member ni chunga MLA i ni reng hi dan bawhchhiatna a nih thu a rawn thlen a, dan angin MLA aṭanga bàntir theih i ni," a ti.

RM Chakma hi kum 2023-a Assembly inthlanpuiah MNF ticket-in Tuichawng bialah MLA atana thlan tlin a ni a, CADC CEM leh MLA a ni kawp mek. The Mizoram State Legislature Members (Removal of Disqualification) (Amendment) Act, 2006 hmangin MLA aṭanga bàn a nih loh chhan tur April 15, 2024 hmaa sawifiah tura tih a ni.

RM Chakma hian dan a bawhchhe lo niin Vanglaini palai a lo hrilh tawh a, "Dan bawhchhia ila chuan ka báng daih tawh ang. Mualpho taka awm kher ka duh bik lo. Mahse, danin min phalsak miau avangin ka báng lo a, danin min phalsak na nã nã, bàn kher ngai ka ti lo," tiin a lo sawi tawh a ni.