Campaign hun a tàwp dawn

Mizoramah April 19, 2024 khian Lok Sabha inthlanpui neih a ni dawn a, vawiin tlai dar 5 hian inthlan atana campaign theih hun a tàwp dawn.

Inthlanpuiah hian vote thlak hun tàwp darkar aṭanga chhiar lêta darkar 48-naah campaign theih hun a tàwp ṭhin. Kumina Lok Sabha inthlanah chuan April 19, Zirtawpni tlai dar 5 thleng vote thlâk hun hawn a nih dawn avangin, April 17 tlai dar 5 chu campaign theih hun tàwp a ni a; silent period a inṭan dawn a ni.

Silent period chhungin media hrang hrang - chanchinbu, TV leh social media-ahte inthlan atana campaign-na thil reng reng tihchhuah khap a ni.