Khawzawlah zirlaibu vailiam

Khawzawl district bawrhsap K Lalrohlua chuan nimin khan a pisa kawt aṭangin Khawzawl district chhung sorkar sikula zirlai 3,065 hnena a thlâwna sem tur zirlaibu a vailiam.

Zirlaibu hi Khawzawl district-a sorkar enkawl leh aided elementary school-te tan pek a ni a; sorkar primary school 40-a zirlai 1,586 leh middle school 36-a zirlai 1,479-te hnenah an vaia indaih tur subject kimin pek a ni.

Pre primary school/ Balvatika-ah pawh Early Childhood Care and Education (ECCE) fund aṭangin zirlaibu pek a ni a; National Education Policy 2020-in a phût angin pawl 1 zirlaite'n thla thum chhung an zirlaibu zir loin, ziak leh chhiar leh, chhiarkawp bulṭhut an man theih nan ‘Zirna Kailawn’ an zir phawt dawn bawk.