CCTV hmang uar turin mipui ngen

Superintendent of Police, Aizawl Rahool Alwal chuan nimin khan SP conference hall-ah thuthar thehdarhtute a kâwm a; tun hnaia Aizawla hmun 12-a thil rûk kaihhnawiha mi pahnih an man chungchang a sawifiah a, CCTV hmang uar turin mipui a ngen.

Rahool Alwal chuan, Aizawlah rûkrûk leh in rawk a hluar thu sawiin, "CCTV dah hian hnu chhuinaah police-te min pui hle a, chenna-in leh a chhehvelah a tam thei ang ber CCTV vuah turin mipui ka ngen a ni," a ti. Tlawmngai pawlte leh khawtlang hruaitute pawh an khawtlanga thil sual titute chhui chhuah a awlsam nan veng chhung hmun hrang hrangah CCTV dah uar turin a ngen bawk.

Aizawl SP chuan, Aizawla hmun pasariha rûkrûknaa inhnamhnawih Vohbik Malsawmdawngzela (23) s/o Lalrintluanga, Darlung, tuna Zemabawka awm mek chu April 11, 2024 khan an man thu sawiin, "A inpuanna aṭangin Aizawl Police Station hnuaia rûkrûk thlenna hmun pahnih, Bawngkawn PS hnuaia hmun pali leh Kulikawn PS hnuaia hmun pakhatah a inhnamhnawih," a ti.

Victor Malsawmdawngzela hian pawisa Rs 8,90,000 leh bungrua chi hrang hrang Rs 74,495 hû a rûk thu te, a pawisa rûk chu heroin lei nan leh nula (KS) kawp nan a hman thute a sawi.

Aizawl SP chuan, March 27, 2024 khan Aizawl PS hnuaia hmun palia bungrua Rs 48,875 hû rutu Malsawmdawngkima (33) s/o T Zoramthara, Bungkawn an man thu a sawi. Malsawmdawngkima hi MINECO-a quarters leh office bakah, Khatla South-a dawr pakhat chu vawi hnih a rawk a ni.