Belhchian dâwl lo leh dâwta inbeih hi tàwp tawh se - Duhoma

ZPM leader Lalduhoma, chief minister chuan, MP atana ZPM candidate-in beih a tawh nasat thu sawiin, politics a nih avanga belhchian dâwl lo leh dâwt hmanga inbeih chu tàwp tawh se an duh thu leh, thil dik lo an chhui chhuah zel dawn thu a sawi.

Lalduhoma hian April 15 leh nimina Hrangturzo bial khaw hrang hranga vantlang inkhawmah thu a sawi a; "Tunlai hian kan MP candidate hian beih a tâwk nasa hle mai a, ramhlui politics zia kan la kalsan thei lo hi a pawi tak zet. Kan candidate hi thil tisualtu ni loin, thil tisualtu chhui chhuahna atana mi ṭangkai tak a ni," a ti.

ZPM Leader chuan, thu dik a tlo ber ṭhin tih sawiin, "Politics a nih avanga belhchian dâwl lo leh dâwt hmanga inbeih hi tàwp tawh se kan duh. Thil dik lo hi sorkar hian a ngaithei dawn lo a, kan chhui chhuak zel dawn," a ti a; pawl ang leh a mimal anga ZPM leh an candidate-te thu dik lang leh mai tur leh thu belhchian dâwl lo hmanga beih an nih ṭhin vanga tun dinhmun thleng thei an nih thu a sawi.

Sorkar angin hmalakna tur an ngah thu sawiin Lalduhoma chuan, "Central lamah project ûm zui tur tam tak a awm a, chumi ti tur chuan MP kan mamawh. Mizoram leh India inkar palai tur kan thlang dawn," a ti a; state sorkar nena ṭha taka thawk dun thei tur ZPM candidate Richard Vanlalhmangaiha vote turin mipui a sáwm.

Lalduhoma chuan, ni 100 chhunga tih tur an duante an tihlawhtling thei zel nia sawiin, "Kan ruahman aia tam kan thawk hman. Leiba ṭhahnem tak kan chhawm a, inrenchem turin hma kan la nghal. Sum hi pûk loh theih loh a ni a, pûk phal chinah nasa takin kan inrêk bung. Budget-te inren zawngin kan siam a, sum hi dik taka hman chuan a lo indaih theih hle a ni tih kan hria," a ti.

Chief Minister chuan, Kolkata Ballygunge-a Mizoram House hmun hralh tawh chu Mizoram mipuiin an ui em avangin neih lêt leh tumin theihtawp an chhuah dawn thu a sawi nawn a; Health Care Scheme-a bill táng zawng zawng chinfel a ni ta chu Pathian leh thawktute zára an tih a nih thu a sawi bawk.