ZPM sorkarin thla thum velah sèlna an dawng nasa - Zodintluanga

Congress ṭhalai chuan nimin khan Lungleia Congress Bhawan-ah Workers Meet an hmang a, All India Congress Committee (AICC) member Zodintluanga Ralte-in thu sawiin, ZPM kaihhruai sorkarin thla thum velah sèlna an dawng nasa niin a sawi.

Zodintluanga Ralte chuan, India rama state hrang hrangah party hrang hrang an sorkar tih sawiin, "Tun anga thla thum vela sorkar an sèl hi a awm ngai lo. Kawng hrang hrangin sêlna an tâwk. Sorkar kal tawhte chu kum thum velah selna an tâwk chauh ṭhin," a ti.

Mipuiin sorkarah beiseina sang tak an nei tih sawiin AICC hruaitu chuan, "Kan CM hi amah leh amah a inhnial a ni ber tawh. Party dang an sawiselna angin an awm char char. Party dang aiin an che phelh tawh," a ti a, mipuiin ZPM sorkar zir chiang se a duh thu a sawi.

Zodintluanga Ralte chuan, Lok Sabha-ah Congress ṭhutna tur a chiang a, MNF chu BJP kaihhruai NDA lamah an ṭhu dawn chiang tih sawiin, ZPM chuan an ṭhutna tur an sawi thei lo niin a sawi a; Mizo ram, hnam leh sakhaw himna atan Congress candidate Lalbiakzama vote turin mipui a ngen.