AMCRA-in thuphá an chawi nawn

All Mizoram Car Rental Association (AMCRA) hruaitute chuan nimin khan Aizawl Press Club-ah thuthar thehdarhtute an kâwm a; an thil nawrnaah hriat sual a awm avanga MLA TBC Lalvenchhunga, SCERT deputy director Florence Lalrinpuii leh ZPM party pawi an sawi chu pawi an ti tak zet thu an sawi.

AMCRA hruaitute chuan, "Kan thil nawrna chungchangah thil hriat sual a awm avangin MLA Pu TBC Lalvenchhunga, adviser to CM te, SCERT deputy director Pi Florence Lalrinpuii leh ZPM party-te pawi kan sawi a ni tih kan hria a, AMCRA chuan pawi kan ti tak zet. Thiam lohna emaw, inhnamhnawihna emaw an nei lo tih mipui hriat turin kan puang a ni," an ti.

An resolution leh press release thu kal zelah Aizawl DC Nazuk Kumar-i'n AMCRA office bearer-te a koh thu sawiin AMCRA hruaitute chuan, an harsatna leh buainate an sawifiahna tih an sawi a; tun hnuah chuan lirthei hman a ṭul chuan AMCRA kaltlanga koh an tum tawh tur thu a lo hrilh niin an sawi bawk.

AMCRA hruaitute chuan, Lengpui Airport-ah hun rei tak aṭanga sorkara an lo dil tawh Prepaid Booking Counter chu March 6, 2024 khan Mizoram sorkarin a pek thu an sawi a, "Tourism lamin hma a sawn phah kan beisei a, sorkar chungah hian thinlung takin lawmthu kan sawi a ni," an ti.