MP inthlan campaign hun a tâwp

Mizorama Lok Sabha inthlanpui chu naktuk Zirtawpni-ah neih a ni dawn ta a, nimin tlai khan campaign theih hun a tàwp a, campaign phal loh hun 'silent period' a ni mek.

Election Commission of India (ECI) thupek angin, nimin tlai dar 5 aṭangin campaign hun a tàwp a, vote thlak ní April 19, Zirtawpni tlai dar 5 thleng silence period niin, campaign phal a ni lo. Inthlanpuiah hian vote thlak hun tàwp darkar aṭanga chhiar lêta darkar 48-naah campaign theih hun a tàwp ṭhin.

Silent period chhungin television (TV) emaw, electronic media/ social media hmanga inthlan kaihhnawih thil tarlan leh tihchhuahte khap a ni tih tarlangin Chief Electoral Officer office thuchhuah chuan, "He hun chhung hian tu mahin election kaihhnawih thila mi koh khawm leh thusawite an ti tur a ni lo a, inthlan kaihhnawih thil television-ah emaw media dangah emaw mipui hmuh theih turin an pho chhuak tur a ni lo," a ti.

Silent period hun bawhchhiate chu kum hnih thleng lung-ina tàntir emaw, lei chawitir emaw, a pahnih emawa hrem theih a ni.

CEO pisa chuan, social media hrang hrang - Facebook, Instagram, X, YouTube, Whatsapp, virtual game world leh a dangahte political advertisement tichhuak duh chuan ECI emaw, state MCMC (Media Certification & Monitoring Committee)-in emaw phalna an pek chauh tihchhuah tur a nih thu a tarlang.

Silent period hman a nih aṭangin campaign hun a tàwp tih tarlangin CEO pisa chuan, "Mipuite'n rilru fím tak leh ngaihtuahna thiang an lo neih theih nana ruahman a ni. He hun hi ṭha taka zawm a nih theih nan candidate leh political party-te anmahni inthunun tura beisei an ni," a ti.