MPSC chhuitu turin hna a thawk ṭan

Mizoram Public Service Commission (MPSC)-in tun hnaia sorkara thawk tur lakna a kalpui danah dik lo a awm nia sawite chhui chiang tura Mizoram sorkarin inquiry officer (IO) a ruat M Lalmanzuala, IAS (Rtd) chuan nimin aṭang khan hna a thawk ṭan a; a chhui chhungin MPSC pisa khàr a ni dawn.

Thu dawn danin, inquiry officer M Lalmanzuala hi Secretariat-ah office pek a ni a, a pisa hi nimin khan a luah ṭan bakah, MPSC chhui hna a thawk ṭan a ni.

Inquiry Officer hi ni sarih chhunga chhui zo tura tih a ni a; Home department ruahman angin, MPSC a chhui chhungin ṭha taka a chhui theih nan leh thil tihdanglam leh khawih chingpen a awm loh nan MPSC pisa chu khâr a ni dawn a, police-te'n an veng nghal a ni.

Tarlan tawh angin, MCS Combined Competitive Examination 2023 kalpui dan leh sorkar hnathawk tur lakna dang kalpui danah thil dik lo a awm nia ngaiin MZP chuan MPSC chairman JC Ramthanga báng turin an phût a, April 15 & 16, 2024 khan MPSC pisa kái turte an dang.

Sorkarin MPSC chhui turin April 16 khan M Lalmanzuala a ruat avangin MZP chuan MPSC pisa kai tur an dan chu an titawp. Mahse, April 16 tlai/zanah MPSC-a thawk zingah pisa kai rû an awm nia an hriat avangin zanah MPSC pisa tualah an pungkhawm leh a; buaina leh harsatna erawh a thleng lo.