Inthlana duty turte an chhuak ṭan

Naktuk Zirtawpnia Lok Sabha inthlana polling station hla zuala duty turte chuan nimin khan an district headquarters aṭangin an duty-na tur hmun an pan.

Nimina chhuak polling party-te chu Lunglei, Lawngtlai leh Mamit district-a mite niin, polling station hla zuala awm turte an ni a; an duty-na tur zinga ṭhenkhat chu kea kal ngai leh lawnglêng hmanga kal ngaite a ni.

Khawpui chhung leh khawpui aṭanga hnai deuhte bakah, inkalpawhna lama harsatna awm lohna polling station-a duty turte chuan vawiin hian an district headquarters ṭheuh chhuahsanin, an duty-na tur hmun an pan ve leh ang.

Lunglei district election officer Ramdinliani, bawrhsap chuan nimin zing dar 7 khan Saikuti Hall kawt aṭangin Lunglei district-a khaw hla zual leh kalpawh harsat zualna hmuna duty tur polling party 13 a vailiam.

Ramdinliani chuan, polling official-te chu Lok Sabha inthlanpui felfai leh thianghlim tak kalpui theihtu tura sorkar mi rinte an nih thu sawiin, "Harsatna in neih chuan nangmahni puitu tur sector officer-te in bul hnaiah an awm reng dawn a, control room aṭang pawhin vil reng in ni ang," a ti a; an mawhphurhnate ṭha taka hlen turin a chah.

Lunglei district-ah hian Lunglei khawpui aṭanga khaw hla zual leh kalpawh harsa zual hmun 13 - Salmur, New Sachan, Mauzam, Terabonia, Dampui, Sumasumi, Tuikawi, Chengkawllui (Samuksury), Ukdasari, Devasora, Bandiasora, Laihausa (Malsury) leh Puankhai khuate a awm a ni.

Lawngtlai district-a polling station 181 zinga Lawngtlai khawpui aṭanga hla zual 116-a duty tur polling party-te chu nimin khan Lawngtlai College aṭangin district election officer Cheemala Siva Gopal Reddy, bawrhsapin a vailiam. Sector bial ṭhen viltu tur sector magistrate 15 chuan an duty-na tur hmun an pan ve nghal bawk.

Polling party kal chhuak turte hian Lawngtlai College-a Dispatch & Receiving Counter aṭangin inthlanna tur hmanrua leh bungruate bakah, strong room aṭangin electronic voting machine leh voter verifiable paper audit trail (VVPAT)-te an la chhuak a; bungruate an endik vek hnuah an duty-na tur hmun panin an chhuak a ni.

Lawngtlai district-a Assembly constituency pathum zinga Tuichawng biala polling station 70-a duty tur polling party-te zawng zawngin nimin khan an duty-na tur hmun an pan nghal vek a; Lawngtlai West biala polling station 69 zinga polling station 32-a polling party-te'n an duty-na tur hmun an pan a, Lawngtlai East biala polling station 42 zinga 14-a duty tur polling party-te'n an duty-na tur an pan ve bawk.

Nimina chhuak ve lo polling party 65 leh sector magistrate 12 chuan vawiin hian an duty-na hmun tur an pan ang.

Mamit district-a Assembly constituency pathuma lirthei luh theih lohna khua, ke leh lawnga kal ngai khaw paruka duty tur polling party-te chuan nimin khan an duty-na hmun tur an pan.

Mamit district-ah hian kea kal ngai khaw pali - Bajirungpu, Kananthar, Zopui leh Chilui-te a awm a; lawnga kal ngai khaw pahnih - Dilzawl leh Tlangkhang a awm bawk. Sotapa khua pawh khawchin azira kea kal ngai tur, ruah sûr leh sûr loha innghat a ni.